Me nismën e Fakultetit të Gjuhëve të Huaja të Universitetit të Tiranës, për të tretin vit radhazi, Fakulteti i Gjuhëve të Huaja dhe Fakulteti i Historisë dhe Filologjisë organizuan me sukses ditën e sotme “Panairin e Punës 2024”!
Ky panair, në edicionin e tretë të realizimit të tij, ka synuar t’u ofrojë studentëve të dy fakulteve që përgatisin specialistë të lartë në shkenca humane dhe sociale, mundësi dhe hapësira të nevojshme për kryerjen e praktikave dhe punësimin e drejtpërdrejtë në tregun e punës.
Me një pjesëmarrje të lartë prej 45 kompanive e institucioneve publike dhe private, nëpërmjet ofertave të ndryshme të prezantuara nga kompanitë dhe organizatat e përzgjedhura posaçërisht me profilin e studimit të tyre, studentët patën mundësinë të eksploronin oportunitetet për praktika profesionale dhe punësim.
Dekania e Fakultetit të Gjuhëve të Huaja, Prof.Dr. Esmeralda KROMIDHA, dhe zv. Dekania e Fakultetit të Historisë dhe Filologjisë, Prof.asoc.Dr. Elsa Skënderi Rakipllari, përshëndetën dhe falënderuan të gjithë pjesëmarrësit për kontributin e tyre në këtë event të rëndësishëm për zhvillimin e karrierës së studentëve.
Në nisje të këtij edicioni, Dekania e Fakultetit të Gjuhëve të Huaja, Prof. Dr. Esmeralda KROMIDHA, u shprehu mirënjohjen të gjitha bizneseve pjesëmarrëse në Panairin e Punës 2024 të cilët ishin më të shumtë në numër. Ajo theksoi se ky Panair, në edicionin e tij të tretë, vazhdon të sjellë bashkëpunime të qëndrueshme me bizneset vendase, bashkëpunime të cilat kanë qenë të vazhdueshme dhe frytdhënëse për lidhjen e drejtpërdrejtë të studentëve me aktorët e tregut të punës. Tryezat e diskutimeve me bizneset, leksionet e hapura, trajnimet nga aktorët e biznesit në auditorët e Fakultetit të Gjuhëve të Huaja kanë bërë të mundur ndarjen e mendimeve dhe përvojave më të mira në drejtim të programeve tona të studimit, aftësimit praktik profesional të studentëve dhe potencialit profesional të tregut të punës si edhe përmbushjen e misionit të tretë të arsimit të lartë. Prof. Dr. Esmeralda KROMIDHA, theksoi se përkushtimi në drejtim të zbatimit të marrëveshjeve të bashkëpunimit ndërinstitucional dhe profesional, ka sjellë garanci për të ardhmen profesionale të studentëve.
Një falenderim i përzemërt ishte për stafet e fakulteteve, përfaqësuesit e zyrave të Këshillimit të Karrierës dhe Administratoret e fakulteteve, për punën e tyre të shkëlqyer në ekip, që solli fryte të dukshme, si në rastin e këtij panairi.
