Përfundoi me sukses trajnimi online me temë “Testimi dhe vlerësimi i të nxënit si dhe nxitja e autonomisë së nxënësit bazuar në Portofolin (PEGJH)”, me 30 kredite me pjesëmarrjen e mësuesve të arsimit parauniversitar nga trajnuesja Prof. Asoc. Dr. Aida Gjinali.
Trajnimi synoi të forcojë praktikat bashkëkohore të vlerësimit dhe të promovojë përdorimin e instrumenteve evropiane në mësimdhënien e gjuhëve.
Gjatë trajnimit u prezantuan dhe u diskutuan konceptet kryesore të Kuadrit të Përbashkët Evropian të Referencave për Gjuhët (KPERGJ) si bazë për planifikimin e mësimdhënies, zhvillimin e kompetencave gjuhësore dhe vlerësimin e të nxënit. Një fokus i veçantë iu kushtua Portofolit Evropian të Gjuhëve (PEGJ) si një mjet pedagogjik që mbështet autonominë e nxënësit dhe nxit vetëvlerësimin e progresit gjuhësor.
Disa nga temat të trajtuara ishin:
- politikat gjuhësore të Këshillit të Evropës dhe rëndësia e përdorimit të KPERGJ dhe PEGJ në institucionet arsimore;
- lidhja e programeve të gjuhëve të huaja me nivelet e kompetencave gjuhësore nga A1 në C2;
- funksionet pedagogjike dhe socio-kulturore të Portofolit Evropian të Gjuhëve;
- përdorimi i dosjes së portofolit si një mjet dokumentues i arritjeve të nxënësve;
- teknikat dhe praktikat e testimit gjuhësor (language testing) për hartimin e testeve sipas niveleve të KPERGJ;
- mënyrat e matjes dhe vlerësimit të kompetencave gjuhësore dhe trajtimi i gabimeve në procesin e vlerësimit;
- përdorimi i teknologjisë dhe metodave bashkëkohore në procesin e vlerësimit.
Në përfundim të trajnimit, pjesëmarrësit ishin të aftë të:
- interpretojnë dhe zbatojnë parimet e KPERGJ në procesin e mësimdhënies dhe vlerësimit;
- analizojnë lidhjen midis kuadrit evropian, kurrikulës dhe programeve të gjuhëve të huaja;
- përdorin Portofolin Evropian të Gjuhëve si mjet për zhvillimin e autonomisë dhe vetëvlerësimit të nxënësve;
- hartojnë instrumente vlerësimi dhe teste të standardizuara në përputhje me nivelet e KPERGJ;
- përcaktojnë kritere të qarta dhe transparente për vlerësimin e arritjeve të nxënësve;
- përdorin vlerësimin si një mjet motivues për të nxitur progresin dhe ndërgjegjësimin e nxënësve për kompetencat e tyre gjuhësore.
Ky trajnim kontribuon në përmirësimin e cilësisë së mësimdhënies së gjuhëve të huaja dhe në forcimin e praktikave moderne të vlerësimit në arsimin parauniversitar.
