Bachelor në “Orientalistikë”

BACHELOR NË “ORIENTALISTIKË”

Objektivat dhe veprimtaritë formuese të programit të studimit

Programi Bachelor në “Orientalistikë” ofrohet në Fakultetin e Gjuhëve të Huaja nga Departamenti i Gjuhëve Sllave dhe Ballkanike dhe synon të formojë specialistë të aftë në gjuhën, kulturën dhe historinë e botës orientale, të pajisur me kompetenca të thelluara gjuhësore, ndërkulturore dhe profesionale, të nevojshme për të vepruar në një shoqëri gjithnjë e më të ndërlidhur globalisht. Programi synon të:

• ofrojë njohuri të qëndrueshme gjuhësore dhe kulturore mbi botën orientale, duke përfshirë gjuhën, historinë, traditat dhe zhvillimet bashkëkohore të rajoneve të Lindjes;
• zhvillojë aftësi të avancuara komunikimi dhe ndërmjetësimi ndërkulturor, në fusha si diplomacia, media, turizmi, arsimi, ekonomia dhe marrëdhëniet ndërkombëtare;
• nxisë kompetencën ndërkulturore dhe mendimin kritik, për të kuptuar dhe interpretuar fenomene kulturore e politike të lidhura me botën orientale;
• përgatisë studentët për vazhdim studimesh në ciklin e dytë ose për integrim të menjëhershëm në tregun e punës si specialistë, përkthyes, redaktorë apo ndërmjetës ndërkulturorë;
• kontribuojë në forcimin e urave kulturore, akademike dhe ekonomike midis Shqipërisë dhe vendeve të botës orientale.

Objektivat Strategjikë të Programit

• Forcimi i kompetencave gjuhësore dhe komunikative: arritja e një niveli të avancuar (B2–C1 sipas KER) dhe komunikim i saktë, i përshtatshëm dhe ndërkulturor.
• Zhvillimi i kompetencës ndërkulturore dhe historiko-kulturore: formimi i specialistëve kompetentë në tekste kulturore, diplomatike, ekonomike, turistike dhe mediatike të lidhura me botën orientale.
• Integrimi i dimensionit praktik dhe profesional: peshë e shtuar e lëndëve praktike dhe praktikave profesionale në bashkëpunim me institucione publike e private.
• Zhvillimi i kërkimit shkencor dhe ndërdisiplinor në gjuhësinë, historinë dhe kulturën orientale.
• Përdorimi i teknologjive të reja në arsim dhe komunikim, përfshirë mjetet dixhitale të mësimdhënies.
• Zgjerimi i bashkëpunimeve akademike dhe ndërkombëtare përmes programeve Erasmus+ dhe projekteve dypalëshe.

Kompetencat

Programi, me një gamë të gjerë lëndësh, të parashikuara gjatë 3 (tre) viteve të studimit, synon:

• Pajisjen e studentëve me njohuri shumë të mira të gjuhës arabe, si dhe të historisë e kulturës orientale;
• Pajisjen e studentëve me njohuri shumë të mira të gjuhës së huaj të dytë, Gjuhës C;
• Zotërimin e përsosur të gjuhës shqipe (Gjuhës A);
• Aftësimin për të komunikuar dhe kaluar nga një gjuhë në tjetrën, duke përdorur regjistrat e duhur gjuhësorë në përshtatje me bashkëbiseduesit;
• Aftësimin për të analizuar dhe interpretuar fenomene historike, kulturore e politike të botës orientale sipas standardeve bashkëkohore akademike;
• Aftësimin për të përdorur teknologjinë e informacionit dhe mjetet dixhitale në procesin e të mësuarit dhe të kërkimit.

Mundësitë e punësimit dhe të kualifikimit profesional

Studentët e diplomuar në programin Bachelor në “Orientalistikë” mund të punësohen si specialistë, këshilltarë apo ndërmjetës kulturorë në:

• institucione publike dhe private;
• organizata ndërkombëtare, ambasada dhe konsullata;
• kompani media dhe televizione lokale;
• shtëpi botuese dhe agjenci shërbimesh publike;
• qendra kulturore dhe agjenci turistike;
• biznese kombëtare dhe ndërkombëtare, si dhe në vetëpunësim si përkthyes apo konsulentë të lirë.

Studime të mëtejshme

Diploma Bachelor në “Orientalistikë” jep mundësi studimi të mëtejshëm në Ciklin e Dytë të Studimit, në fusha si studime orientale, marrëdhënie ndërkombëtare, komunikim ndërkulturor, si dhe në degët e shkencave humane dhe të komunikimit.

Bashkëpunime ndërkombëtare dhe programi Erasmus+

Departamenti i Gjuhëve Sllave dhe Ballkanike ka bashkëpunime akademike me institucione partnere nëpërmjet programit Erasmus+, si dhe marrëveshje me universitete evropiane që ofrojnë programe të ngjashme, duke u mundësuar studentëve dhe pedagogëve mobilitet akademik dhe pjesëmarrje në shkëmbime ndërkulturore.

PLANI MËSIMOR Bachelor në “Gjuhë moderne dhe teknologji digjitale”