Dega e Trajnimeve dhe Inovacionit Pedagogjik
“Inovacioni në arsim nuk është një zgjedhje, por një domosdoshmëri”
Ken Robinson

E themeluar në vitin 2022, Dega e Trajnimeve dhe Inovacionit Pedagogjik ka për mision planifikimin, organizimin dhe ndjekjen e vazhdueshme të aktiviteteve trajnuese që kontribuojnë në zhvillimin profesional të studentëve, personelit ndihmës akademik me karakter administrativ, si dhe personelit akademik. Përmes ofrimit të trajnimeve dhe programeve të moduleve të formimit të vazhduar profesional në fusha të ndryshme, Dega e Trajnimeve dhe Inovacionit Pedagogjik synon rritjen e kapaciteteve, përmirësimin e praktikave pedagogjike dhe integrimin e inovacionit në proceset mësimore, në përputhje me standardet bashkëkohore të arsimit të lartë dhe nevojat institucionale.

Vizioni ynë është të bëhemi një degë udhëheqëse dhe model në fushën e trajnimeve dhe inovacionit pedagogjik, duke kontribuar në krijimin e një mjedisi akademik dinamik, inovativ dhe të orientuar drejt përgatitjes së profesionistëve të aftë për sfidat e së ardhmes.

Zhvillimi profesional i qëndrueshëm
Ofrimi i trajnimeve të avancuara dhe të personalizuara që përmirësojnë aftësitë dhe njohuritë e të gjithë aktorëve akademikë dhe administrativë.

Inovacioni pedagogjik
Promovimi dhe integrimi i metodave dhe teknologjive të reja në procesin mësimor për rritjen e cilësisë së arsimit.

Zgjerimi i ofertës trajnuese
Hartimi dhe zhvillimi i programeve të reja të studimit të formimit të vazhduar në fusha multidisiplinare, të përshtatura me nevojat e tregut dhe kërkesat akademike.

Bashkëpunimi institucional dhe ndërkombëtar
Forcimi i partneriteteve me institucione arsimore dhe organizata të tjera për shkëmbimin e eksperiencave dhe praktikave më të mira.

Vlerësimi dhe monitorimi
Ndërtimi i sistemeve të vlerësimit efektiv për të garantuar cilësinë dhe përmirësimin e vazhdueshëm të trajnimeve dhe inovacionit pedagogjik në Fakultetin e Gjuhëve të Huaja.