Në kuadrin e aktiviteteve të javes së Panairit të 28-të të Librit – “Ndërgjegjja jonë ka nevojë për librat” (Ismail Kadare) u zhvillua takimi me autorët e librit “Labirint në tru”, Evans Drishti, Zoje Jakaj (Xhoi) dhe Endri Beqo, të cilët trajtojnë problemet e zhvillimit individual të adoleshentëve.
Ky takim u zhvillua në Fakultetin e Gjuhëve të Huaja, në Departamentin e Gjuhëve Sllave e Ballkanike me studentët e Degës së Gjuhës Turke dhe pedagogët e gjuhës turke, Prof. Asoc. Dr. Xhemile Abdiu, Dr. Alban Foçi, Prof. Asoc. Dr. Spartak Kadiu, Msc. Nurjana Demiraj dhe Prof.Asoc. Dr. Adriatik Derjaj.
Ky libër i kushtohet adoleshentëve dhe botës së tyre të ndërlikuar, dhe nëpërmjet tregimeve reale e analizave përçon mesazhin për më shumë dëgjim dhe empati ndaj brezit të ri.Prof.Asoc.Dr. Xhemile Abdiu prezantoi të ftuarit e këtij takimi, Dr. Zoje Jakaj (Xhoi), z. Evans Drishti dhe z. Endri Beqo.
Më pas e mori fjalën Dr. Zoje Jakaj (Xhoi), e cila foli për eksperiencën e saj shumëvjeçare në mësimdhënie, punën me nxënësit, për përgjegjësitë e marra gjatë karrierës së saj në postin e drejtoreshës së burgut të grave, për angazhimet e saj në shoqërinë civile, për libra e shkruar deri më tani dhe në mënyrë të veçantë për librin e shkruar në bashkëpunim me Evans Drishtin dhe Endri Beqo “Labirint në tru”, i cili u prezantua para studentëve dhe pedagogëve të pranishëm. Dr. Zoje Jakaj tha se në një kohë të re sfidash për adoleshentët dhe të rinjtë “Mesazhi kryesor i këtij libri është një thirrje për t’u dëgjuar nga mësuesit, nga prindërit, nga të rinjtë, nga vëllezërit, nga motrat, nga e gjithë shoqëria.”
Bashkautori i këtij libri, z. Evans Drishti foli gjerësisht për rëndësinë e familjes dhe të mësuesve në edukimin e adoleshentëve dhe të rinjve, për artin e mësimdhënies, për pasionin e punës me nxënësit dhe të rinjtë, për komunikimin, për empatinë, për nevojën për të dëgjuar adoleshentin-nxënësin-të rinjtë. Me një elokuencë të jashtëzakonshme në prezantimin e tij z. Evans Drishti theksoi se brenda secilit prej nesh ka ende një fëmijë, dhe ky fëmijë nuk lind i keq. Ky fëmijë edukohet nga familja dhe në shkollë dhe se mësuesi ka një rol të jashtëzakonshëm në edukimin e adoleshentit/nxënësit/të rinjve se dhe puna e tij nuk duhet të kufizohet vetëm në minutat e orës së mësimit, duhet të shkoj përtej shpjegimit të temave të mësimit për nxitur punën individuale e krijuese dhe zhvillimin e talentit tek çdo adoleshent/nxënës/të ri, në mënyrë që të kemi një shoqëri të shëndoshë në të ardhmen.Bashkautori z. Enri Beqo, prezantoi punën e tij si mësimdhënës i artit, punët e tij në ekspozita të ndryshme, paraqitjen nëpërmjet karikaturave të evoluimit të njeriut nga libri tek celulari. Ai theksoi rëndësinë e artit në zhvillimin e adoleshentëve/nxënësve/të rinjve larg celularëve dhe botës virtuale, si dhe mesazheve që përcillen në librin “Labirint në tru” përmes artit të karikaturës.
Prof.Asoc.Dr. Adriatik Derjaj, Dr.Alban Foçi, Prof. Asoc.Dr. Spartak Kadiu, Msc.Nurjana Demiraj, Prof.Asoc.Dr. Xhemile Abdiu falenderuan autorët e librit “Labirint në tru” për kohën që i kushtuan studentëve dhe pedagogëve të Degës së Gjuhës Turke në Departamentin e Gjuhëve Sllave e Ballkanike të Fakultetit të Gjuhëve të Huaja të Universitetit të Tiranës dhe për bashkëbisedimin e këndshëm. Studentët e pranishëm i drejtuan pyetje të ndryshme autorëve dhe studentja Bega Dancevska lexoi një pasazh nga ky libër.
