Në kuadër të “Programit mbi gjuhën dhe kulturën kineze”, ishte i ftuar Sinologu Iljaz Spahiu, i cili bëri një prezantim të filozofit antik kinez Laozi dhe librit të tij “Tao Te Ching”. Spahiu tha se “Tao Te Ching” është vepra e parë e plotë filozofike në historinë e Kinës antike si dhe burimi kryesor i mendimit filozofik të Taoizmit. Z. Spahiu u shtjelloi kuptimin e dy koncepteve bazë të ketij libri, Tao dhe Te, ku Tao-s cilësohet si rruga e universit dhe e natyrës, ndërsa Te (virtyti, morali) si aplikimi i saj në botën reale. Spahiu përmendi edhe disa koncepte nga ky liber si, “Qeverisja e një vendi është si gatimi i peshqeve të vegjel” apo “Mirësia supreme është si uji”, duke theksuar ndikimin që Laozi ka patur ndaj kulturës tradicionale kineze, por edhe filozofisë perëndimore, duke u shndrruar në një mendim me përmasa kombëtare. Sinologu Spahiu foli edhe për eksperiencën e tij në përkthimin e librave kineze, kryesisht të letersisë kineze. “Përveç njohjes së gjuhës, tha ai, sfida më e rëndësishme ishin dallimet kulturore. Përkthimi është sa i vështirë aq edhe i rëndësishëm, ndërsa përkthyesit jane ura lidhëse mes qytetërimeve. Z. Spahiu përgëzoi studentët që marrin pjesë në këtë program, duke uruar që ai të t’ju zgjoje interesin për gjuhën dhe kulturën kineze.
